>> NATURA IN LUTU ( a R. Ziri )
No ala 'e bentu
non tzinnit foza
in sas campuras de sa Baronia.
Non pìulu 'e puzone
non si tremet bèstia
in sos padentes nigheddos de monte Arbu.
Unu ribu falende est a sa muda
in s'iscuricore de baddicros
a tenner pasu in sa paule manna de Posada.
In notes de luna
in manzanile de istiu
non cantat prus sa filomena.
Su tazu mannu de sa roba
andat paschende
in sos gardajos de Isalle :
non sentit su dolu
ch'est rucrande
sos zassos ispantados de Sardinna.
In ispricos de mare
in lucores de granitu
sa natura est in lutu
corrutande unu poeta
unu poeta sardu.