Le  poesie  di  Mario  Sanna   

>> APO A TORRARE

Apo a torrare
a sos cunzados solianos de su Tuvu,
apo a chircare torra
s'umbra de s'èliche bentosu in su bedustu,
in sas caluras de s'istiu,
e sos massajos mannos
in cherta de pasu e de friscura.

Apo a torrare
a intènder su tenore
de chìcchelas e grillos in olibas sonnicrosas
e sa turtura turba turba
unu jubu chi non si moghet mai.

Apo a torrare
a su negòssiu anticu
" a ti l'amentas cando,
pitzinnu puzone in su cunzadu
bolabas dae chima in chima chertorande
unu pupu, una pira, una pruna cherfa,
in trìbulas crompinde in pessu in pessu?"

So moghidu dae su monte a sa bassura
e mi pariat su mare
froridu de rosas e gravellos.

So faladu
a iscras semenadas de liberos e pinnas;
in campos de sièntzia apo messadu
ispicas de bentu
chi nemos at a seghedare.

Cantu tretu fatu dae tando
peri trocos e petorros
pro m'aposentare in artos ispuntones
ube no intendes sa calura
chi brùsiat sa carena in s'isfenonzu!

Apo a torrare,
ma non bi sunt prus
sos massajos mannos
chi m'ant indissiadu
in camineras de luche e de recreu.

Apo a torrare
e non b'at a chie apo a contare
" a ti l'amentas cando "
e non b'at cun chie
gosare sas balentias fatas e s'onore,
lastimare su tempus coladu
ponende in prozetu s'imbeniente.

Sichit su tenore de chìchelas e grillos
in su desertu ‘e sos cunzados
e su tzìulu de su conchineddu
est unu tùnchiu, unu lamentu,
un'amentu
de istios serenos
de anticas pitzinnias.

Apo a torrare
a mi negossiare nessi in bisu
cun sas pantumas de sos bennidores
in sas binzas ispartas in sa badde.

Apo a torrare
a tentare bacas e jubos
chi s'ant apertu àghidos
in sos campos de s'anima
a meriacrare in umbras de amentos.

Apo a torrare
a mutire dae costa in costa,
jubilande de badas,
ca mi rispondet petzi
su mutricore de sa badde
in sa prima intrighinada de sa die.

Guarda il video di Apo a Torrare